طاب وبعدين... ؟-
!وبعدين في ايه ...؟*
في اللي انا فيه ، انا حاسس اني في ساقية مش -
عارف دخلتها امتي تحديدا و مش عارف هطلع منها امتي ، انا حاسس زي ما يكون كنت بسوق عربيتي و كنت مبسوط اوي في الاول بالطريق و باني سايق ،وحر في اختيار المكان اللي اروحه في الوقت اللي عايزه ، ودللوقتي كأني وعيت فجأة علي حقيقة اني ماشي في الطريق ليا كتير بس انا مش عارف انا رايح فين !
و لما وقفت شوية ، حسيت الناس كلها حواليا ، رايحة وجاية ، بتختار طريقها ، وبتمشي وانا مش
عارف
ومين قالك انهم عارفين فعلا هما رايحين فين ؟*
انا حاسسهم كده ، ماشيين بثقة ، بياخدوا -
قرارات
، بيتحركوا يا عم ، وانا واقف محلك سر مش فاهم المشكلة فين ، فيا ولا فيهم ولا في الظروف ولا في
ايه بالظبط ، انا مش فاهم حاجة ، و الشعور ده سخيف .
أنا فاهم شعور انك مش فاهم حاجة *
ومقدر شعورك ده اوي.... بس....
مش كل حركة معناها نمو
ومش كل سكون معناه ان مفيش تغيير وحركة
مش كل اللي انت شايفه هو الحقيقة الكاملة
يا عم بقولك مش فاهم حاجة ، تيجي تكلمني بألغاز- وجمل مكلكعة ، هو انا ناقص
مش قصدي أضايقك ، اقعد افهمك بالراحة ، ولو إن فيه حاجات مش هنبقي فاهمينها للآخر ..
يا عم بقولك مش فاهم حاجة ، تيجي تكلمني بألغاز- وجمل مكلكعة ، هو انا ناقص
مش قصدي أضايقك ، اقعد افهمك بالراحة ، ولو إن فيه حاجات مش هنبقي فاهمينها للآخر ..
مش كل حركة حواليك معناها حركة بتكبر صاحبها ، يمكن تكون شايف ناس حواليك بتتحرك كتير لكن مش كل الحركات دي حركات بتكبر
فيه ناس بتتحرك لمجرد انهم ميقعدوش بلا حركة ،فيه ناس بتتحرك مدفوعة بدوافع مش حقيقية ، او بدوافع مش نابعة منهم ، ممكن يتحركوا عشان يحققوا اهداف تفرح اهلهم لكنها مش اهدافهم هما ، فيه ناس بتتحرك عشان اتقالهم انتوا المفروض تتحركوا وهما اتعودوا يعملوا كل حاجة عشان يرضوا الناس .فيه ناس بتتحرك عشان غيرهم اتحرك وهما بس بيقلدوا عشان يعملوا زي ما الباقي بيعمل .
الحركة حلوة و مرغوبة ، بس فهمت انا بقولك ايه ؟ ، مش كل حركة بتكبر ، فيه حركات بنخسر قصادها حاجات كتير ، يمكن وقت من عمرنا ، يمكن نخسر ناس ، يمكن نخسر فلوس ، بس اهم حاجة ، متتحركش اي حركة وانت عشانها تخسر نفسك .
ومتتحركش اي حركة الا اذا كانت هتكبرك . يعني هتفرق معاك ، هتنقلك لحتة تانية تتطور فيها ، هتخليك شخص احسن ، متتحركش غير وانت متأكد ان حركتك دي نابعة من جواك عشان تعرف تكمل .
-ممممم. ...طب وازاي فيه اوقات السكون فيها يعني فيه نمو ؟
*لانك يا سيدي مش مكنة ، انت بني آدم بتتعب وبتحتاج راحة وعشان تشحن طاقتك تاني محتاج وقت مستقطع كل فترة ، تعيد فيه النظر للامور من زاوية بعيدة، تشوف انت كنت فين ودللوقتي انت فين . انت اوقات بتفتكر نفسك واقف محلك سر لكن لو رجعت وتابعت نفسك هتلاقي فيه حاجات كتير اتغيرت فيك ، فيه اختلاف في شخصيتك وفي كيانك كله وفيه خطوات انت اخدتها لقدام فعلا ، مش لازم نقطع اشواط كبيرة عشان نقول اننا اتحركنا ، التقدم ببطء حركة بردو .
-تصدق عندك حق ! انا فعلا مختلف عما كنت السنة اللي فاتت
* بالظبط ، حلو اوي انك قلت علي مدة سنة دي .
عشان تتابع نفسك ، حط وقت زمني كبير
زي سنة مثلا
وتقارن بين نفسك القديمة من سنة ونفسك دللوقتي
وده هيخليك تشوف ان فيه حركة وتطور وانت مش ملاحظه ، وكل الشغل اللي عليك انك تخلي الحركة دي ايجابية والتطور للاحسن مش للاسوأ .
-جميل اوي ، وايه كمان؟ .. شكلك فاهم يا نصة !
*عايز اقولك ، متنساش انك في خطة الله ، انت صنعة ايده وهو بيشكل فيك ، في كل يوم ، في كل موقف ، في كل فترة من حياتك . اوقات فترات تبان لينا ملهاش اي معني و مش فاهمين فيها حاجة بس عشان احنا بنحاول نفهم قطعة من لوحة كبيرة ، ومش هتفهمها غير لما اللوحة تتشاف كاملة علي بعضها .
اللي هيسندك في الوقت ده انك تفتكر ايام ومواقف وفترات صعبة عدت عليك وربنا ازاي طلعك منها و طلعت شخص اجمل وانضج . و كانت الفترات دي ضلمة بالنسبة لك ومش واضح لها اي معني او ملامح . ...
- ايوه ، افتكرت ، دول كتيير ... انا دايما بنسي اللي عمله معايا وفيا.
* عارف ، انا النهاردة كنت بفكر ، ابراهيم وموسي ويعقوب وغيرهم كتير ، عدت عليهم فترات رتيبة في حياتهم ، اكيد كان عندهم تساؤلات وقتها و مخاوف و مشاعر صعبة.
يعني ابراهيم مثلا ، طول السنين اللي عدت دي وهو عمال يكبر وسارة مراته بتكبر ، يا تري كان بيواجه الاسئلة اللي جواه ازاي ، اللي هو انت فين يا رب ؟ فين وعدك ان هيكون ليا نسل وانا وسارة بنشيخ اهو ولينا سنين ومفيش اي تغيير ؟
بس اللي كان بيبان انه وقت سكون مفيهوش اي حركة كان وقت عمل للرب في ابراهيم وفي سارة.
وزيه يعقوب ، وموسي .
-يمكن مشكلتي اني عايز افهم كل حاجة ...
*يمكن دي مشكلتنا كلنا ، بس الايمان معناه انك تبقي مش فاهم بس تختار تصدق ، تبقي مش معاك اي ضمانات وتختار الله هو ضمانك ، اللي هو انا مش عارف انا رايح فين يارب بس انا رايح المجهول ده معاك ، وده كفاية . انا مش هاخد
اماني من ظروفي ، لكن هاخد اماني منك انت ، انك هتكون معايا وانا همسك فيك مهما كانت الظروف ايه.
-بس دي حاجة صعبة اوي...
*بس مش مستحيلة ، و بعدين لا يستحيل علي الرب شئ .
ها عرفت انت رايح فين ولا لسه ؟
لسه مش فاهم حاجة ؟
-انا رايح اقعد معاه شوية . رايح آخد منه طاقة أكمل و انا مش فاهم ....
يكفيني افهم انه عارف هو بيعمل ايه كويس.
