تعرف تقف عند اللي بيحصلك بس متقفش أوي؟! ، بمعني : خد منه الدرس واتعلم من غلطك ، بس متفضلش تلوم نفسك كتير وتجلد نفسك فتحبط ومتعرفش تكمل يومك
تعرف تعدي المواقف ، وتبادر إنك تتأسف ؟ سواء كنت غلطان أو الأصعب لو كنت أنت اللي مش غلطان ، بس ده عشانك انت ،بدل ما تفضل متقل بمشاعر سلبية جواك ...عشان سلامك الداخلي
تعرف تواجه خوفك ؟ ...اعمل اللي بيخوفك ، ابدأ بأكتر حاجة صعبة وتقيلة علي قلبك النهاردة ، اعمل الحاجة اللي بقالك مدة مأجلها عشان خايف منها أو مستتقلها ، يللا ...العمر مش كتير زي ما انت فاكر
"The problem is that we think we have time " .
تعرف ترمي ورا ضهرك كل اللي حصل النهاردة ؟ ، ومتسحبهوش معاك لبكرة ، إحنا فينا حيل نفسي قد إيه يعني عشان نجر معانا هم النهاردة لبكرة ؟ ، كفاية بكرة بهمه و يكفي اليوم شره .
تعرف تشوف الحلو ؟، نص الكباية المليان زي ما بيقولوا ، بغض النظر عن كم التريقة اللي طلعت علي الجملة ديه ، لكن فعلا كل شئ ليه وجهين ، وكل حاجة وحشة حصلت ليها جانب إيجابي ، قرر إنك تلاقيه وتشوفه وتديه حجمه....قرر واعمل كده
تعرف تسقف لنفسك علي انجازاتك الصغيرة ؟ انت اللي تشجع نفسك ، انت اللي تقولك برافو ، برافو انت صحيت بدري النهاردة ، برافو انت متعصبتش وكان رد فعلك هادي وحكيم ، برافو انت ظبط أكلك ... برافو انت أنجزت في الحاجات اللي كان المفروض تعملها ، مش لازم علي فكرة نعمل اختراعات عشان نقول لنفسنا برافو
تعرف تسيبها علي الله ؟ الجملة البسيطة ديه اللي بيقولوها الناس الغلابة البسطا ،ومش هيعرف يعملها غير اللي قلوبهم بسيطة كمان ...اللي شالك امبارح هيشيلك النهاردة وبكرة كمان . متنساش غلاوتك قد إيه ، قد ابنه ... انت مدفوع فيك كتير اوي ..
وبمناسبة الغلاوة ، يمكن فيه ناس بتحب ابن ليها أكثر من الباقي ، لكن الله مش كده ، كلنا عياله ، وكلنا بيحبنا ، متفضلش تشوف حد أحسن منك وتقارن نفسك بيه ، انتوا الاتنين أبناء محبوبين ، لكن كل واحد فيكم ليه سكة مختلفة، دعوة مختلفة، طريقة إعداد مختلفة ، وبالتالي ظروفه مختلفة
وربنا عارف هو بيعمل إيه كويس أوي
شوف انت بتطلب إيه منه ، واطلب صح
بمناسبة الطلبات الصح ، مرة حد قالي "لو هتطلبي طلب من رئيس الجمهورية ، هتبعتيله مرسال تقوليله ، لو سمحت يا سيادة الرئيس ، محتاجة خمسة جنيه ؟! "
ساعتها فهمت شوية يعني إيه "عمق طلبك ورفعه "
يعني إيه "اطلبوا أولا ملكوت الله وبره ، وهذه كلها تزاد لكم " ويمكن هفضل وقت كتير من عمري أفهم فيهم كمان
تعرف ؟ إحنا كلنا تقريبا نعرف كل الكلام ده ...بس محتاجين نجاهد عشان نعيشه
