فضلت متنح فيها كتير
صورة حابسة ناس جواها
ابص عليها وأفتكر وقت
راح وساب ذكري معاها
لحظات حلوة وضحكة قلب
أدفع اي حاجة فداها
وحاجات وحشة تسد النفس
أقول سبحان مين عداها
وناس بعشقهم ومعاهم قضيت
لحظات عمري ما هنساها
بحب الصور لأن اللحظة
لو عدت مش هنلقاها
فيه لحظات حلوة لدرجة
تبص للصورة تحس بدفاها
ولحظات تانية الناس فيها
مكشرة والضحكة الهم محاها
عارفين الأوضة جوه القلب
اللي بنشيل الحبايب جواها ؟
ديه شايلة صور ياما
تسرح وتقول ما أحلاها
ما تتحسرش علي لحظة فاتت
وتقول فين تاني ألقاها
اللحظة اللي بتمر دللوقتي
بإيدك تغير مصير ذكراها
No comments:
Post a Comment