قالوا حاجات كتير
وحاجات كتير معجبتنيش
ومثلت اني بضحك
وان الكلام موجعنيش
أوقات ظهر علي وشي
واتسألت مالك؟
قلت مفيش
ولما عيطت
قالوا متزعليش
وكأن الأمر سهل
بزرار أدوسه
الزعل ميجيش
أو هبطل أبقي خايفة
لما يقولوا متخافيش !
******************
كان جوايا كلام كتير
وكل اللي طلع
كلمتين صغيرين
عرفت أطلعهم
لواحد بس أو اتنين
بيبقي سجن لما
الواحد يكون حزين
ومش عارف يهرب
من نفسه يروح فين
وكأن همومه ومخاوفه
قيود فيه ماسكين
********************
جيت أكلمه
من غير كلام
في وسط دوشتي
كان نفسي في سلام
وأطمن إن في إيديه
كل حاجة هتبقي تمام
رحت أقوله علي مخاوفي
وشاركته كمان بالأحلام
********************
قلتله انت وعدت
كل احتياج لينا تملاه
بس احنا الأول نطلب
ملكوت الله ورضاه
ونحبه زي ما هو
حب الإنسان وفداه
وقلوبنا تتملي بحبه
ونعمل باللي وصاه
**********************
قلتله علمني أستني
حتي لو ظروفي طالت
وأفضل ماسك في كلامك
مهما الناس قالت
ولما شيلتي تتقل
وإيديا تكون تعبت ومالت
أفتكر إن ياما تعبت
وإيديك معايا شالت
No comments:
Post a Comment