حرة ولكن ...

كنت بفكر مؤخرا في قد إيه حجم الأشياء بالنسبة لنا مختلف وإن إحنا اللي بنحدد ده مش الناس ، أنا اللي بقرر إن العيلة بالنسبة لي أهم حاجة في حياتي ، فبالتالي بديهم وقت وطاقة أكتر ، وانا ممكن أقرر إن الشغل هو أهم حاجة في حياتي وبالتالي هبذل فيه مجهود أكبر وهديله حيز من حياتي مش قليل، وممكن  أقرر إن الخدمة وأعمال الخير هي أهم حاجة في حياتي ، وهكذا ...

الشكل ،  والمظاهر ، والفلوس ، كل حاجة ... أنا اللي بقرر حجمها إيه بالنسبة لي. 

فالأولويات ديه حاجة احنا اللي بنختارها ، واكيد هتكون مختلفة ما بينا ، فمنستناش إن حد يقولنا إيه أولوياتنا ، ولا نستني إن كل الناس  توافق علي أولوياتنا ، ولا نحاول إننا ناخد أولويات حد وننسخها علي حياتنا ،الموضوع اختيار شخصي  بحرية كاملة 

وكل اختيار محتاج وعي.  أنا اخترت اولوياتي تكون كذا وكذا ،فبالتالي انا واعي بنتائج اختياري ده وتبعياته ، ولو اتضايقت منها فمش هلوم حد لأن اللي اختار هو أنا . 

الموضوع ده مرهق جدا ، لأن أحيانا اختياراتنا بتكون مش زي المألوف والمتعارف عليه ، فرد فعل الناس ناحيتها بيكون سخيف . تريقة ، مهاجمة ، تثبيط . بالرغم من  إن الاختيارات ديه مش غلط في حد ذاتها، لكن بعض الناس شاطرين اوي في مهاجمة ما هو مختلف عنهم . مع إن احنا نفسنا مختلفين في كل حاجة ، جيناتنا ،  شخصياتنا وطباعنا و رسالتنا في الحياة فبالتالي هتكون اختياراتنا مختلفة .

ومرهق كمان عشان مفيش حاجة كاملة ، اختياري لحاجة معينة فوق حاجة تانية يعني إني هحتاج تضحيات معينة، زي تضحية بوقت، براحة ، بأوقات مع عائلتي ، بوقت مع أصحابي ، تضحيات مادية ، وغيرها .

مفيش حاجة للأسف كاملة .تحقيق التوازن من أصعب المهام اللي واجهتها شخصيا  . وأقات بحس إن دراستنا لأي قرار من ناحية إيجابياته وسلبياته قبل ما ناخده بتكون فيها ضبابية شوية ، لأن الحاجة من بعيد مختلفة عن إني أدخلها وأعيشها ، أحيانا مش بنكون قادرين نقدر ونقيم الأمور بدقة وإحنا من بعيد . 

فيه صعوبة كمان من ناحية المسئولية ، أحيانا بنخاف من حقيقة إن حياتنا وأولوياتنا واختياراتنا ديه مسئوليتنا إحنا وبس ، ممكن تاخد نصيحة وتستشير وتاخد رأي من هنا ومن هناك لكن في النهاية انت المسئول عن حياتك انت  .

بفكر نفسي النهاردة إني حرة أختار اللي يناسبني ، ومش ملزمة إن كل الناس تصدق علي اختياراتي ديه وتوافق عليها .  ومسئولة عن كل اختيار صغير وكبير .  وبصلي إني يكون عندي حكمة في اختيارتي وفي تقديري للأمور . وإن يكون عندي تصالح مع التضحيات اللي هتتبع أي قرار .