الألم

...يمكن الألم بيسكنك ويهديك عشان تسمع صوت ربنا 

 بيخليك تشوف قد إيه انت عاجز ، قليل الحيلة مش قادر تتكل علي ذراعك ،وعلي امكانياتك، عشان تعرف أنه اتكالك الصح هو علي الرب ،  والنصرة من عنده هو 

علي كل معضلة في حياتك 

علي الأفكار الصغيرة ، لكن المكدرة ليك

مش بعلمك، ولا بقراياتك الكتيرة ولا بشطارتك ولا فهلوتك هتنتصر عليهم

يمكن الألم هو المزنق 

زي ما بني إسرائيل اتحطوا فيه 

من وراء فرعون وجيوشه 

ومن قدامهم البحر 

بالمنطق البشري هالكين لا محالة 

بالمنطق البشري هما مش هيعرفوا يعملوا حاجة 

لكن اللي وعد بأنهم هيدخلوا ارض الموعد هو الملزم بانه يتصرف  

مش مهم ازاي ، ديه حاجة مش شغلهم

"قفوا وانظروا خلاص الرب "

مش مهم نفهم ازاي ، لكن المهم هو انه هيخلص . هو قال هتدخلوا ارض الموعد يبقي هو هيتصرف 

يمكن الصحراء او الألم اللي هتمشي فيه هو اللي هيخليك تشوف ربنا أقرب 

(كان يسير معهم بعمود سحاب نهارا وعمود نار ليلا )

يمكن الألم هو اللي بيخليك تدرك للآخر قد ايه انت محدود ومحتاجه 

مش الفكرة  انه خالقك ناقص ، فتتذل ليه عشان تنجح في مقاصدك ، وإلا ليه كان فيه اشرار ناجحين جدا لدرجة أن داود بث شكواه امام الله وقاله (لماذا ينجح طريق الاشرار ) ... بالعكس ، الله خلق كل واحد عنده مواهب وامكانيات مميزة 

(ولكن (بدوني لا تقدرون أن تفعلوا شيئا 

لأنه بدونه الحياة عديمة المعني والهدف ...وغير مشبعة 

 يقيني أن البعد الابدي بينشئ معني من الألم 

يمكن الألم هو أحيانا الطريقة الوحيدة اللي هتشكل فينا بعض المناطق عشان نكون إنسان يصلح للملكوت 

الألم طريقة إعدادك لتملك في كنعان (رمز أورشليم  السمائية

بعيدا عن كل دوشة ومجد باطل وأفكار كتيرة العالم بيقدمها لينا .. لكن "كل اللي بيحصل في الارض هيروح للأرض " .. بس إحنا نهاية قصتنا مش نهاية حياتنا علي الأرض ..

يمكن البعد الأبدي هو اللي بيهون علينا شوية كل حاجة بتوجعنا ومش فاهمين للآخر هي موجودة في حياتنا ليه 

  إن كان لنا في هذه الحياة فقط رجاء في المسيح فإننا أشقي جميع الناس