كرهت الشتا اللي حبيته
عشان خدناه حجة غياب
كرهت الضيق اللي جوايا
وكل كلام بنغمة عتاب
كان موجه لناس ف يوم
سميتهم ليا أصحاب واحباب
كرهت الشاشات المنورة
اللي خلقت بيننا مسافات
لما استسهلنا نكتب لبعض
وبدلنا التفاعل الكامل بسكات
والعمر الضايع قدامها
في اللاشئ بندفع ساعات .
كرهت سني اللي معاه
إحساس اللخبطة و التوهان
ولا عارف تبقي كبير
ولا صغير زي زمان
مع صراع كل يوم
عايز تحس بقيمتك كإنسان
كرهت وقت ما بقعد وحدي
و اواجه أفكاري وأسئلتي الكتير
ويكتروا عليا في معركة خايبة
تنتهي باستسلامي ورجوعي للسرير
وإني أبص لسكة ناس تانية
واقارن حياتي بيهم واغير
مع اني عارف لكل حد
سكة هي ليه مش للغير
وتمر الساعات والأيام
وتعدي الشهور والمشهد متغيرش
واصلي واصبر واستني
اي تغيير يحصل .. ميحصلش
واقول لنفسي اطمن
واقول لنفسي اطمن
لازم يكون لك إيمان ..مينفعش
تفضل قلقان وخايف
وامورك في أيد إله مابينامش
والمشهد نهايته مفتوحة
آخرته إيه .. انا معرفش !
No comments:
Post a Comment